Als 24 november 1957 ais gnida fundeda la secziun da chatscheders Droslöng. Qualchedüns chatscheders curaschus e cun vast orizont da la regiun da La Plaiv (cumüns da S-chanf, Zuoz, Madulain e La Punt) haun già quella vouta badò, ch'üna secziun füss la güsta plattafuorma per d'üna vart cultiver l'amizizcha traunter chatscheders e da l'otra vart eir per discutter dumandas politicas in connex culla chatscha. Il „nouv naschieu“ nu vulaiva insè propi prosperir. Per divers problems haun gieu da gnir chattedas soluziuns, scu per exaimpel la dumanda, in che lingua cha füss da comunicher in societed, in tudas-ch u in rumauntsch. Eir las radunanzas da secziun füttan frequentedas be da fich pochs commembers. Grazcha a'l grand ingaschamaint dals fundatuors as ho pudieu racogler bainbod früts da lur fadias. Duos ans zieva la fundaziun quintaiva la nouva secziun gia 43 commembers, üna clera cumprova per la necessited da l‘agir dals fundatuors.

Cun organiser minch'an üna saireda tramegl cun preschentaziun da las trofeas ais gnida deda eir a las duonnas dals chatscheders la pussibilited da's parteciper vi da las activiteds da lur homens. Quista saireda vain menda tres auncha hoz ais fich stimeda e frequenteda da bgers commembers e lur duonnas.

I'l temp d‘hozindi vain dapertuot fusiunò. Già cuort zieva la fundaziun da Droslöng as ho penso da funder üna granda secziun in Engiadin'Ota. Ma la radunanza da secziun nun ho gieu üngün'incletta per quist'idea e t'illa ho sbütto cun granda magiorited. La secziun dess crescher e prosperir our d‘egnas forzas.

Ils prüms ans manchaivan ils raps – contribuziuns da commembers nu's cugnuschaiva auncha. La suprastanza ho decis d'introdüer üna taxa da butin per la chatsch'ota. Ün tor da tschierv custaiva frs. 3.-- üna vacha da tschierv frs. 2.--, ün chavriöl u ün chamuotsch custaivan frs. 1.-- e per üna muntanella as paiaiva 10 raps.

Ponderaziuns scu ch'ellas vegnan per part fattas eir hoz da spuster il temp da chatsch'ota haun do da stüger als chatscheders. Ils motivs eiran simpels: divers chatscheders avessan gieu d'entrer in cuors da repetiziun dal militer düraunt la chatscha. Ün grand cusgler chi faiva part a la suprastanza da Droslöng ais gnieu activ e ho preschantò a Cuira la dumanda. Il parlamaint grischun nun ho però vis üngüna necessited per quist giavüsch e t'il ho tramiss gio per l'assa eir scha la chatscha grischuna scu chatscha dal pövel giodaiva granda reputaziun illa populaziun.

La secziun autonoma crescha ad ün crescher e quinta bainbod 70 commembers. L'an 1960 ais la scocieted da chatscheders Droslöng gnida commebra da l'associaziun da chatscheders da patenta grischuna. A partir d‘allò as ho as dedichò seriusamaing a dumandas intuorn la chatscha per tschercher soluziuns per ils divers problems. Il territori da Droslöng cunfina a quel dal parc naziunel que chi ho chaschunò divers problems: las surpopulaziuns da tschiervs illa regiun, la politica d'asils ma eir la dumanda da pavler la sulvaschina düraunt l'inviern. Numerus commembers da la secziun haun mussò grand ingaschamaint in discussiuns ma eir illa realisaziun dals problems. Ils prüms ans auncha flaivla, as svilupet Droslöng in direcziun d'üna secziun cun grand'arcugnuschentscha tar tuots ils respunsabels. Contacts intensivs cul cusglier guvernativ ma eir cul inspectorat da chatscha haun dò la pussibilited da pigler grand'influenza in dumandas politicas, in dumandas da chüra u sül champ da chauns da saung. Las prestaziuns da Droslöng sun arcugnuschidas in tuot il chantun usche cha hoz sun ils pilasters da la secziun fich sauns e laschan sperer sün ün avegnir prosperus da Droslöng.